The Heid Horseman

By Violet Jacob

    O Alec, up at Soutar’s fairm,
        You, that’s sae licht o’ he’rt,
    I ken ye passin’ by the tune
        Ye whustle i’ the cairt;

    I hear the rowin’ o’ the wheels,
        The clink o’ haims an’ chain,
    And set abune yer stampin’ team
        I see ye sit yer lane.

    Ilk morn, agin’ the kindlin’ sky
        Yer liftit heid is black,
    Ilk nicht I watch ye hameward ride
        Wi’ the sunset at yer back.

    For wark’s yer meat and wark’s yer play,
        Heid horseman tho’ ye be,
    Ye’ve ne’er a glance for wife nor maid,
        Ye tak nae tent o’ me.

    An’ man, ye’ll no suspec’ the truth,
        Tho’ weel I ken it’s true,
    There’s mony ane that trails in silk
        Wha fain wad gang wi’ you.

    But I am just a serving lass,
        Wha toils to get her breid,
    An’ O! ye’re sweir to see the gowd
        I braid about my heid.

    My cheek is like the brier rose,
        That scents the simmer wind,
    An fine I’d keep the wee bit hoose,
        ‘Gin I’d a man to mind!

    It’s sair to see, when ilka lad
        Is dreamin’ o’ his joe,
    The bonnie mear that leads yer team
        Is a’ ye’re thinkin’ o’.

    Like fire upon her satin coat
        Ye gar the harness shine,
    But, lad, there is a safter licht
        In thae twa een o’ mine!

    Aye – wark yer best – but youth is short,
        An’ shorter ilka year –
    There’s ane wad gar ye sune forget
        Yon limmer o’ a mear!

Share on facebook
Share on twitter
Share on whatsapp
Share on telegram
Share on email
Download
Get a copy sent to your email right NOW!
Free Poetry Editing
Checklist & Guidelines
Download Free Checklist
Download
Get a copy sent to your email right NOW!
Free Poetry Editing
Checklist & Guidelines
Download Free Checklist
Join Our Family & Subscribe To Our Newsletter
Privacy Policy: This information will never be shared with third parties.
Subscribe Now!
Join Our Family & Subscribe To Our Newsletter
Privacy Policy: This information will never be shared with third parties.
Subscribe Now!