The Lost Licht (A Perthshire Legend)

By Violet Jacob

    The weary, weary days gang by,
        The weary nichts they fa’,
    I mauna rest, I canna lie
        Since my ain bairn’s awa’.

    The soughing o’ the springtide breeze
        Abune her heid blaws sweet,
    There’s nests amang the kirkyaird trees
        And gowans at her feet.

    She gae’d awa’ when winds were hie,
        When the deein’ year was cauld,
    An noo the young year seems to me
        A waur ane nor the auld.

    And, bedded, ‘twixt the nicht an’ day,
        Yest’re’en, I couldna bide
    For thinkin’, thinkin’ as I lay
        O’ the wean that lies outside.

    O, mickle licht to me was gie’n
        To reach my bairn’s abode,
    But heaven micht blast a mither’s een
        And her feet wad find the road.

    The kirkyaird loan alang the brae
        Was choked wi’ brier and whin,
    A’ i’ the dark the stanes were grey
        As wraiths when I gae’d in.

    The wind cried frae the western airt
        Like warlock tongues at strife,
    But the hand o’ fear hauds aff the he’rt
        That’s lost its care for life.

    I sat me lang upon the green,
        A stanethraw frae the kirk,
    And syne a licht shone dim between
        The shaws o’ yew and birk.

    ‘Twas na the wildfire’s flame that played
        Alang the kirkyaird land,
    It was a band o’ bairns that gae’d
        Wi’ lichts in till their hand.

    O white they cam’, yon babie thrang,
        A’ silent o’er the sod;
    Ye couldna hear their feet amang
        The graves, sae saft they trod.

    And aye the can’les flickered pale
        Below the darkened sky,
    But the licht was like a broken trail
        When the third wee bairn gae’d by.

    For whaur the can’le-flame should be
        Was naither blink nor shine –
    The bairnie turned its face to me
        An’ I kent that it was mine.

    An’ O! my broken he’rt was sair,
        I cried, “My ain! my doo’!
    For a’ thae weans the licht burns fair,
        But it winna’ burn for you!”

    She smiled to me, my little Jean,
        Said she, “The dule and pain,
    O mither! frae your waefu’ een
        They strike on me again:

    “For ither babes the flame leaps bricht
        And fair and braw appears,
    But I canna keep my bonnie licht,
        For it’s droukit wi’ your tears!”

    There blew across my outstreeked hand
        The white mist o’ her sark,
    But I couldna reach yon babie band
        For it faded i’ the dark.

    My ain, my dear, your licht shall burn
        Although my een grow blind,
    Although they twa to saut should turn
        Wi’ the tears that lie behind.

    O Jeanie, on my bended knee
        I’ll pray I may forget,
    My grief is a’ that’s left to me,
        But there’s something dearer yet!

Share on facebook
Share on twitter
Share on whatsapp
Share on telegram
Share on email

About Us

Pick Me Up Poetry seeks to be an agent of change in society by fostering cross-cultural dialogue and providing much-needed information and representation for writers and performers. We offer our followers insightful glimpses into cultures around the globe through various mediums including our online articles, published anthologies, live spoken-word events and more. 

LEVEL UP!
Drop your email and we'll send you 25 poetry editing guidelines to help transform your creative writing!
Send It!
LEVEL UP!
Drop your email and we'll send you 25 poetry editing guidelines to help transform your creative writing!
Send It!
Take 20% OFF
Your first purchase
Shop Now
Join Our Family & Subscribe To Our Newsletter
Privacy Policy: This information will never be shared with third parties.
Subscribe Now!
Join Our Family & Subscribe To Our Newsletter
Privacy Policy: This information will never be shared with third parties.
Subscribe Now!